Եվրոհանձնաժողովը հաստատել է 1,5 մլրդ եվրոյի ծրագիրը՝ ԵՄ-ի և Ուկրաինայի պաշտպանության ամրապնդման համար

Եվրոպական հանձնաժողովը հաստատել է 1,5 մլրդ եվրոյի աշխատանքային ծրագիր՝ եվրոպական և ուկրաինական պաշտպանական արդյունաբերությանն աջակցելու համար, ասվում է Եվրոհանձնաժողովի կայքում հրապարակված հայտարարության մեջ:

Նշվում է, որ ավելի քան 700 մլն եվրոն կուղղվի առանցքային պաշտպանական արտադրանքի արտադրության ավելացմանը, ներառյալ ԱԹՍ-ների դեմ պայքարի համակարգերը, հրթիռներն ու զինամթերքը, որոնցից 260 մլն եվրոն կուղղվի անմիջապես Ուկրաինային՝ նրա պաշտպանական արդյունաբերության վերականգնմանն ու արդիականացմանը և արտադրության ընդլայնմանը: Եվս 325 մլն եվրո կհատկացվի Ուկրաինայի և Նորվեգիայի մասնակցությամբ ԵՄ երկրների համատեղ պաշտպանական նախագծերին:

Բացի այդ, 240 միլիոն եվրո կհատկացվի համատեղ սպառազինության գնման համար: Եվս 100 միլիոն եվրո կտրամադրվի պաշտպանական ստարտափներին և փոքր ընկերություններին, իսկ 35,3 միլիոն եվրոն կօգտագործվի ռազմական նորարարությունների զարգացման և ուկրաինական ու եվրոպական ձեռնարկություններին աջակցելու համար: