«Կենտրոնական պողոտաներից հանե՛ք կայանատեղիները»․ Արշալույս Մղդեսյան

2659

Ուրբաթ, 03 ապրիլի, 2026 թ., 16:18

Լրագրող Արշալույս Մղդեսյանի ֆեյսբուքյան գրառումը․ «Մինչ քաղաքապետարանը քննարկում ու ձգձգում է Աջափնյակի մետրոյի կայարանի նախագծի իրականացումը («շինարար» հայ ազգը 35 տարում մի մետրոյի կայարան չկարողացավ կառուցել, բայց խոսել դրա մասին՝ որքան ուզես), Երևանն արագ տեմպերով դառնում է... ավելի ճիշտ՝ արդեն դարձել է կյանքի համար անհարմար քաղաք:
Առավոտը բացվում է, ու մարդկանց դիմավորում են նյարդայնացնող և օրը փչացնող խցանումները, որոնք աճում են երկրաչափական պրոգրեսիայով, և ճանապարհների փոսերը, որոնք շատանում են նույն տեմպով։
Ու այս ամենի ֆոնին, կտրուկ և կյանքի որակ փոխող որոշումներ կայացնելու փոխարեն, քաղաքային իշխանությունը վարում է պարզապես ընթացիկ սպասարկման քաղաքականություն: Ամիսներ շարունակ խոսում ու խոստանում են 45 տրոլեյբուս ձեռք բերելու մասին՝ իրենց պահելով այնպես, կարծես զարգացած եվրոպական քաղաքի իշխանություն լինեն, որտեղ տրանսպորտի լուրջ խնդիրներ վաղուց չկան, և մնում է միայն ընթացիկ սպասարկում իրականացնել:
Հարգելի՛ քաղաքապետարան, կենտրոնական պողոտաներից հանե՛ք կայանատեղիները, ավելացրե՛ք ավտոբուսների գծերը (որպեսզի դրանք երկու փողոց հետո չընդհատվեն), շատացրե՛ք հանրային տրանսպորտը: Կենտրոնում ավտոկայանատեղիների թանկացումը, ըստ իս, ճիշտ որոշում է, որը պետք է պահել, բայց աշխատող է համակարգի մեջ, ոչ առանձին վերցրած:
Ավտոբուսներում պետք է պարբերաբար հատուկ համազգեստով հսկիչներ շրջեն՝ վերահսկելու, որ բոլորն ուղևորատոմս գնեն: Չգնելու դեպքում տուգանվեն, որքան էլ դա պոպուլյար չլինի:
Երևանի խնդիրներն ունիկալ չեն. շատ քաղաքներ են գնացել նման լուծումների՝ մարդկանց կյանքն ավելի հարմարավետ դարձնելու համար: Ուղղակի այդ քաղաքներում նման բարդ որոշումները կայացվել են և ԻՐԱԿԱՆԱՑՎԵԼ:
Ավել-պակասի համար կներեք, որքան ժամանակ է սա խմորվում էր իմ մեջ»:

Աղբյուրը` Արշալույս Մղդեսյան