Կլոդ Մոնեի` մեկ դարից ավելի անհայտ մնացած կտավները կհանվեն աճուրդի

Ապրիլի 16-ին Փարիզում կայանալիք ժամանակակից արվեստի աճուրդում կներկայացվեն իմպրեսիոնիզմի հիմնադիրներից մոկի՝ Կլոդ Մոնեի երկու կարևոր աշխատանքները: Ինչպես հայտնում է Sotheby's աճուրդի տան մամուլի ծառայությունը, սա վերջին 20 տարվա ընթացքում նկարչի՝ Ֆրանսիայում վաճառքի հանված ամենաթանկարժեք գործերն են:
Արվեստասերները հնարավորություն կունենան ձեռք բերել «Վետյոյ. առավոտյան տպավորություն» (1901) կտավը, որի նախնական գնահատված արժեքը (էստիմեյտը) տատանվում է 6-8 միլիոն եվրոյի (շուրջ 6,9-9,2 միլիոն դոլար) սահմաններում:

Այս աշխատանքը Մոնեն վաճառել էր դեռևս 1902 թվականին, և 1972-ից ի վեր այն գտնվում է նույն մասնավոր հավաքածուում՝ տասնամյակներ շարունակ անհասանելի մնալով լայն հանրության համար:

Երկրորդ գլուխգործոցը՝ «Կղզիները Պորտ-Վիլում» (1883) կտավը, գնահատվում է 3-5 միլիոն եվրո (3,4-5,7 միլիոն դոլար): Այս գործը նույնպես վերջին անգամ ցուցադրվել է անցյալ դարասկզբին:

Հարկ է նշել, որ Մոնեի՝ երբևէ վաճառված ամենաթանկ աշխատանքը համարվում է «Խոտի դեզը» կտավը, որը 2019 թվականին աճուրդում օտարվել է ռեկորդային՝ 111 միլիոն դոլարով:

Ապրիլյան աճուրդը նշանավորվելու է նաև Մարկ Շագալի աշխատանքների ներկայացմամբ: Վաճառքի կհանվեն նկարչի «հեքիաթային կրկեսային» շարքի յոթ կտավներ, որոնք ստեղծվել են 1950-ական թվականներին: