«Դեմոկրատները կարող են Թրամփի դեմ հայց ներկայացնել՝ Իրանի դեմ գործողության պատճառով»․ #Time

Քոնգրեսի դեմոկրատները քննարկում են ԱՄՆ նախագահ Դոնալդ Թրամփի դեմ դատական ​​հայց ներկայացնելու հնարավորությունը, եթե Սպիտակ տան ղեկավարը որոշի շարունակել Իրանի հետ հակամարտությունը մայիսի 1-ից հետո՝ առանց օրենսդիր մարմնի հավանության, հաղորդում է Time-ը՝ հղում կատարելով իր աղբյուրներին։

Մայիսի 1-ին լրանում է 60-օրյա ժամանակահատվածը, երբ Թրամփը Քոնգրեսին տեղեկացրել է Իրանի դեմ ռազմական գործողության մասին: Դրանից հետո նա իրավականորեն պարտավոր կլինի կամ ստանալ օրենսդիր մարմնի հավանությունը՝ ռազմական գործողությունները շարունակելու համար, կամ գրավոր հավաստել, որ զորքերի անվտանգ դուրսբերման համար անհրաժեշտ է ևս 30 օր:

«Ներքին քննարկումները (հայց ներկայացնելու մասին - խմբ.), որոնց մասին ավելի վաղ չի հաղորդվել, օրենսդիրները բնութագրել են որպես դեռևս վաղ փուլում գտնվող, բայց կարող են ակտիվանալ առաջիկա շաբաթներին, եթե նախագահը շարունակի ռազմական գործողությունը մայիսի1-ին 60-օրյա ժամկետի ավարտից հետո»,- գրում է լրատվամիջոցը:

Նշվում է, որ դեմոկրատները դեռևս վերջնական որոշում չեն կայացրել դատական ​​հայց ներկայացնելու վերաբերյալ՝ նախ ձգտելով քննարկել բոլոր հնարավոր օրենսդրական տարբերակները: Մասնավորապես, սենատոր Ադամ Շիֆը նախատեսում է այս շաբաթվա վերջին կրկնակի քվեարկություն անցկացնել նախագահի ռազմական լիազորությունները սահմանափակող բանաձևի վերաբերյալ: