Բագրատ Սրբազանի նոր ստեղծագործությունը` կալանավայրից

Բագրատ Սրբազանը նոր ստեղծագործություն է հղել կալանավայրից․

«Երևման Սուրբ Խաչի Կիրակի
(Հայրենական)
Երազներս սահման չունեն…

Հանուն գալիք Հաղթանակիդ
Խաչանշան Արշալույսի՝
Երազներս սահման չունեն…

Հանուն Սիրուդ պսակումի,
Քո Սիրո հետ նույնանալու՝
Երազներս սահման չունեն…

Քո Լույսի մեջ կանթեղացած
Ցավող սրտիդ երգ լինելու՝
Երազներս սահման չունեն…

Խոցված կյանքդ ամոքելու,
Տառապանքդ իմ գրկի մեջ դարմանելու՝
Երազներս սահման չունեն…

Ծիծաղիդ մեջ ծավալվելու,
Անափ Հույսիդ շող դառնալու՝
Երազներս սահման չունեն…

Վես Ճախրանքիդ թև լինելու,
Քո Հեքիաթի բարեհաղթի,
Անհաղթ Երթիդ վերադարձին՝
Երազներս սահման չունեն…

Հաղթությունդ, Սերդ, Լույսդ,
Խոցված Կյանքիդ Ցավող սիրտդ,
Տառապանքդ ու Ծիծաղդ,
Անափ Հույսդ, Վես Ճախրանքդ,
Քո Հեքիաթի, Անհաղթ Երթի
Խաչանման Արշալույսդ
Իմ կյանքն են…
Եվ ճանապարհը՝
Նույնանալու պսակիդ հետ:
Կանթեղացած թրթռոցով
Ամոքումիդ երգ դառնալու,
Դարմանումիդ մեջ ծավալվող
Շող լինելու՝ թևեր անսանձ,
Բարեհաղթիդ վերադարձով
Խաչանման Արշալույսիդ
Երազներս սահման չունեն…

Ինչ որ ունեմ, միայն Դու ես,
Եվ ամբողջը միայն Քոնն է,
Որի համար
Երազներս սահման չունեն…

Հայրենիքի կալանավոր
Բագրատ արք. Գալստանյան
Ի Տօնի Երեւման Սուրբ Խաչի»։