ԱՄՆ-ի խնդրանքով ՌԴ քաղաքացիների ձերբակալման բարձր ռիսկ ունեցող երկրների թվում ընդգրկվել է նաև Հայաստանը

Ռուսաստանի քաղաքացիներն արտասահման մեկնելիս պետք է հաշվի առնեն երրորդ երկրներում կալանավորվելու և ԱՄՆ-ին արտահանձնվելու ռիսկը․ «Ռիա Նովոստի»-ին հայտնել է ՌԴ ԱԳՆ մարդու իրավունքների բազմակողմ համագործակցության վարչության տնօրեն Գրիգորի Լուկյանցևը։

«Շատ պետություններ, ոչ միայն ԵՄ-ում, այլև ավելի լայն շրջանակներում, ունեն որոշակի պարտավորություններ արտահանձնման վերաբերյալ: Այս ամենը պետք է հաշվի առնել այն ռիսկերը գնահատելիս, որոնց կարող են բախվել մարդիկ արտասահման մեկնելիս», - ասել է Լուկյանցևը՝ հավելելով, որ ԱԳՆ-ն չի որոշում, թե ուր գնան ռուսները, իսկ ուր՝ ոչ, այլ կարող է միայն խորհուրդ տալ որոշակի երկրներ չայցելել, եթե քաղաքացիները կարծում են, որ կարող են խնդիրներ ունենալ ամերիկյան կամ եվրոպական իշխանությունների հետ։

ՌԴ ԱԳՆ-ի կողմից հրապարակված տեղեկատվության համաձայն՝ ԱՄՆ-ի խնդրանքով ՌԴ քաղաքացիների ձերբակալման բարձր ռիսկ ունեցող երկրների թվում են Եվրոպայի և Լատինական Ամերիկայի մեծ մասը, ինչպես նաև Ավստրալիան, Կանադան, Հայաստանը, Իսրայելը, Մալդիվները, Հարավային Կորեան, Սինգապուրը, Թաիլանդը, Ֆիջին, Շրի Լանկան, Լիբերիան և Մարոկկոն։ Սակայն նախարարությունը նշում է, որ այս ցանկը չի ներառում բոլոր այն երկրները, որոնք ԱՄՆ-ի հետ կնքել են արտահանձնման պայմանագրեր։