«The Insider-ի «հետաքննության» մեջ բերված փաստարկները բացահայտ սուտ են և կազմակերպված սադրանք»․ ՌԴ ԱԳՆ

The Insider պարբերականի հրապարակումը, որտեղ պնդվում էր, թե Հայաստան են ուղարկվել ԱՀԾ, ԳՀՎ և ԱԴԾ աշխատակիցներ՝ ՀՀ վարչապետ Նիկոլ Փաշինյանին հակազդելու համար, սուտ է։ Այս մասին թելեգրամյան իր ալիքում հայտնել է ՌԴ ԱԳՆ մամուլի ծառայությունը։

««Հետաքննության» մեջ ներկայացված փաստարկները ոչ այլ ինչ են, քան բացահայտ ստեր և կազմակերպված սադրանք, նպատակ ունենալով հոգեբանական ճնշում գործադրել ռուս դիվանագետների վրա և վախեցնել հայ հասարակությանը ընտրություններից առաջ», - ասվում է հայտարարության մեջ։

Նշվում է, որ նյութում ներկայացված տեղեկատվությունը չի հիմնավորվում համոզիչ ապացույցներով և պարունակում է փաստական ​​սխալներ։ «Մեղադրանքները հաստատող որևէ համոզիչ փաստ The Insider-ն ի վիճակի չէ ներկայացնել», - նշել են ԱԳՆ-ում:

Նախարարությունը նաև հերքել է ռուսական կառույցների դեմ ուղղված մեղադրանքները՝ Հայաստանի ներքին գործերին միջամտելու վերաբերյալ: Գերատեսչությունը հայտարարել է, որ Ռուսաստանի դիվանագիտական ​​աշխատանքը հանրապետությունում իրականացվում է 1961 թվականի Վիեննայի դիվանագիտական ​​հարաբերությունների մասին կոնվենցիային համապատասխան։

Նախարարությունը հրապարակումը դիտարկել է որպես Ռուսաստանին և նրա կապերը Հայաստանի հետ վարկաբեկելու արշավի մի մաս: «Մենք «ռուս գործակալների» մասին այս վերջին «սենսացիան» դիտարկում ենք որպես Ռուսաստանին Հարավային Կովկասից դուրս մղելու արշավի ևս մեկ դրվագ», - հայտարարել է նախարարությունը: