Իրանը հայտնել է Հորմուզի նեղուցով նավագնացության նկատմամբ լիակատար վերահսկողություն ստանձնելու մասին

Առևտրային նավերը շարունակում են տարանցիկ տեղաշարժը Հորմուզի նեղուցով՝ Իրանի ռազմածովային ուժերի կողմից ստանալով համապատասխան թույլտվություն:

«Վերջին 24 ժամվա ընթացքում 20 առևտրային նավ է անցել Հորմուզի նեղուցով՝ ԻՀՊԿ ռազմածովային ուժերի համակարգմամբ և թույլտվությամբ», - ասվում է Իրանի Իսլամական հեղափոխության պահապանների կորպուսի (ԻՀՊԿ) ռազմածովային ուժերի մամուլի ծառայության հայտարարության մեջ, որը մեջբերում է իրանական Tasnim լրատվական գործակալությունը։

Նշվում է, որ Թեհրանը շարունակում է «հիմնավոր և ուժային» վերահսկողություն իրականացնել Հորմուզի նեղուցում նավագնացության նկատմամբ, և ցանկացած ագրեսիա կհանդիպի Իրանի զինված ուժերի ջախջախիչ պատասխանին։