ԱՄՆ Քոնգրեսի հանձնաժողովում քվեարկության կդրվի Ադրբեջանում պահվող հայ գերիներին ազատ արձակելու կոչ ներառող նախագիծը

Ամերիկայի Հայ Դատի Հանձնախումբը (ANCA) ողջունում է Ներկայացուցիչների պալատի Արտաքին հարաբերությունների հանձնաժողովի երկկուսակցական քայլը՝ առաջ տանելու Ներկայացուցիչների պալատի արտաքին ծառայության մասին օրենքում (H.R. 9086) առաջարկված փոփոխությունը, որով կոչ է արվում Ադրբեջանին անհապաղ և անվերապահորեն ազատ արձակել բոլոր հայ ռազմագերիներին և քաղբանտարկյալներին։ Այս մասին հայտնում է Ամերիկայի Հայ դատի հանձնախումբը։ Փոփոխությունը, որը նախաձեռնվել է Քոնգրեսի հայկական հանձնախմբի փոխնախագահ Բրեդ Շերմանի կողմից, հանձնաժողովի մշակման փուլն անցել է՝ ստանալով Ներկայացուցիչների պալատի Արտաքին հարաբերությունների հանձնաժողովի նախագահ Բրայան Մասթի աջակցությունը և այժմ սպասվում է, որ այն կուղարկվի հանձնաժողովի անվանական քվեարկության։

Շերմանը նշել է, որ պատանդների ազատ արձակումն ուղղակիորեն կապված է նախագահ Դոնալդ Թրամփի՝ Հարավային Կովկասում խաղաղության հաստատման ջանքերի հետ։ «Քանի դեռ նախագահ Թրամփը շարունակում է իր ջանքերը՝ Հարավային Կովկասում տևական խաղաղություն ապահովելու ուղղությամբ, հայ ռազմագերիների և քաղբանտարկյալների ազատ արձակումը նշանակալի քայլ կլինի այդ նպատակին հասնելու ճանապարհին»,- ասել է Շերմանը։