Մատենադարանին է նվիրաբերվել 4000-ամյա վաղեմության աքքադական կավե սալիկ

Մատենադարանի հնագույն ձեռագրերի հավաքածուն համալրվել է բացառիկ նմուշով. արքայազն Դանի Բադավին Մատենադարանին է նվիրաբերել գրեթե 4000 տարվա վաղեմության աքքադական պայմանագիր՝ փորագրված կավե սալիկի վրա։
Մ.թ.ա. 1750-1712 թվականներով թվագրվող այս եզակի գտածոն ստեղծվել է Հին բաբելոնյան դարաշրջանում: Այդ շրջանում աքքադերենը եղել է Բաբելոնի և Ասորեստանի հիմնական վարչական ու դիվանագիտական լեզուներից մեկը։ Այն գրվել է սեպագիրով՝ կավե սալիկների վրա, ինչը թույլ է տվել պահպանել բազմաթիվ իրավական, տնտեսական և կրոնական փաստաթղթեր։ Այս լեզուն ունի մեծ պատմական արժեք, քանի որ դրա միջոցով մեզ են հասել աշխարհի ամենահին օրենքներից մի քանիսը, այդ թվում՝ Համմուրաբիի օրենսգիրքը։
Նվիրաբերության շրջանակներում արքայազն Բադավին այցելել է Մատենադարան: Այս նվիրատվությունն ունի նաև խորհրդանշական և պատմական ենթատեքստ։ Մշակութային դիվանագիտության հարցերով բանագնաց Դանի Բադավին սերում է ասորական Թխումա ցեղից, և Մերձավոր Արևելքի հնագույն քաղաքակրթությունների ժառանգությունը հայկական հաստատության խնամքին հանձնելը դիտարկվում է որպես յուրահատուկ բարեկամական ժեստ տարածաշրջանի երկու հնագույն ժողովուրդների միջև։
Նշենք, որ շուրջ 23 հազար ձեռագիր և մագաղաթ պահպանող Մատենադարանը՝ որպես ՅՈՒՆԵՍԿՕ-ի «Աշխարհի հիշողություն» ցանկում ընդգրկված կառույց, հաճախ է համալրվում հենց նմանատիպ անհատական նվիրատվությունների շնորհիվ, ինչը շարունակական է դարձնում հաստատության կայուն զարգացումը։