Զելենսկին պատժամիջոցներ է սահմանել ռուսական ԶԼՄ-ների և դատավորների նկատմամբ

Ուկրաինայի նախագահ Վլադիմիր Զելենսկին ստորագրել է հրամանագիր, որով ուժի մեջ է մտել Ուկրաինայի Ազգային անվտանգության և պաշտպանության խորհրդի որոշումը՝ ռուսական քարոզչական լրատվամիջոցների և դատավորների նկատմամբ պատժամիջոցներ սահմանելու մասին, հայտնում են ուկրաինական լրատվամիջոցները։

Պատժամիջոցների փաթեթում ներառվել է 29 ֆիզիկական և 17 իրավաբանական անձ։

Նշվում է, որ նրանց թվում են դատավորներ, որոնք մասնակցել են Ուկրաինայի քաղաքացիների նկատմամբ քրեական հետապնդումներին՝ Ռուսաստանի տարածքում և Ղրիմի թերակղզում։

«Այս փաթեթը ներառում է նաև ռուսական քարոզչական լրատվամիջոցներին և դրանց ղեկավարներին, որոնք ներգրավված են ստերի և ռուսական քարոզչության համակարգված տարածման մեջ: Դրանց թվում են Gazeta.ru-ն, Lenta.ru-ն և Ռուսաստանի լրագրողների միությունը»,- նշվում է հայտարարության մեջ: