«Յուրաքանչյուր արևմտյան ադրբեջանցի իրավունք ունի վերադառնալ իր նախնիների հողերը»․ Ասկերով

Ադրբեջանի Միլի Մեջլիսի փոխխոսնակ Զիյաֆեթ Ասկերովը անհիմն է անվանել «արևմտյան ադրբեջանցիների» վերադարձի հարցի գնահատումը որպես Հայաստանի նկատմամբ տարածքային պահանջ: Ադրբեջանական լրատվամիջոցների հաղորդմամբ՝ այս մասին խորհրդարանականը հայտարարել է Օրդուբադում՝ «Վերադարձ դեպի Արևմտյան Ադրբեջան» III կոնգրես-փառատոնի շրջանակներում լրագրողների հետ զրույցում։ «Մենք պարզապես ուզում ենք խաղաղությամբ, միջազգային իրավունքին համապատասխան վերադառնալ մեր հայրենի հողեր և ապրել այնտեղ անվտանգ ու արժանապատվորեն», - ասել է նա։

Նրա խոսքով՝ «արևմտյան ադրբեջանցիների իրենց պատմական հողեր վերադարձը» Ադրբեջանի արտաքին քաղաքականության կարևոր առաջնահերթություններից մեկն է։

«Արևմտյան Ադրբեջանի համայնքի գլխավոր նպատակն է միջազգային հանրությանը հասցնել Արևմտյան Ադրբեջանի մասին ճշմարտությունը, պաշտպանել այս հողերից տեղահանված մեր հայրենակիցների իրավունքները և ապահովել նրանց խաղաղ վերադարձը հայրենիք: Համայնքի ղեկավարությունը ակտիվորեն աշխատում է այս ուղղությամբ միջազգային հարթակներում, այդ թվում՝ ՄԱԿ-ում: Յուրաքանչյուր արևմտյան ադրբեջանցի իրավունք ունի վերադառնալ իր նախնիների հողերը, և սա նրանց իրավական, պատմական և բարոյական իրավունքն է: Որովհետև այս հողերը մեր նախնիների տարածքներն են», - ասել է Ասկերովը: