«Հայաստանի և Ադրբեջանի միջև անհայտ կորած անձանց տվյալների բազա կստեղծվի»․ Քեթրին Բոմբերգեր

Հայաստանի և Ադրբեջանի միջև անհայտ կորած անձանց տվյալների բազա կստեղծվի։ Բազայի միջոցով երկու երկրները կփոխանակվեն անհայտ կորած անձանց վերաբերյալ տեղեկություններով․ քաղաքացիները կկարողանան անանուն կերպով տվյալներ տրամադրել։ Ադրբեջանական լրատվամիջոցների հաղորդմամբ՝ այս մասին հայտնել է Անհայտ կորածների հարցերով միջազգային հանձնաժողովի (ICMP) գլխավոր տնօրեն Քեթրին Բոմբերգերը։

Նրա խոսքով՝ տվյալների բազան հիմնված կլինի համագործակցության այն մոդելի վրա, որը կիրառվել է նախկին Հարավսլավիայում։ «Այսօր այդ տարածաշրջանի կառավարությունները, չնայած հակամարտության ավարտից անցել է երկար ժամանակ, ստեղծել են անհայտ կորած անձանց հարցերով համատեղ աշխատանքային խումբ։ Նրանք ձևավորել են տվյալների միասնական բազա, որն ընդգրկում է մինչ օրս չփակված գործեր, և այդ բազայի միջոցով փոխանակվում են տեղեկություններով։ Մենք հույս ունենք, որ այս տվյալների բազայի միջոցով նույնպես հնարավոր կլինի հասնել նման արդյունքի»,- նշել է նա։