«Աջակցում ենք Ադրբեջանի և Հայաստանի միջև խաղաղության գործընթացին»․ Հորդանանի ԱԳ նախարար

Հայաստանի և Ադրբեջանի միջև խաղաղության համաձայնագրի ստորագրումը կարևոր քայլ կլինի տարածաշրջանային կայունության ամրապնդման առումով։ Ադրբեջանական լրատվամիջոցների հաղորդմամբ՝ այս մասին Բաքվում Ադրբեջանի արտգործնախարար Ջեյհուն Բայրամովի հետ համատեղ ասուլիսում հայտարարել է Հորդանանի փոխվարչապետ, Արտաքին գործերի նախարար Այման Ալ-Սաֆադին։

«Մենք մտքեր ենք փոխանակել նաև տարածաշրջանային զարգացումների վերաբերյալ։ Նախ շնորհավորում ենք ձեզ խաղաղության համաձայնագրի նախաստորագրման և Հայաստանի հետ միջպետական հարաբերությունների հաստատման կապակցությամբ: Մենք ողջունում ենք այս քայլը, որը կնպաստի խաղաղության ամրապնդմանը ոչ միայն երկու երկրների, այլև ողջ տարածաշրջանի համար: Ուստի մենք լիովին աջակցում ենք այդ գործընթացին»,- եզրափակել է նախարարը։