«Սահմանազատման գործընթացի շրջանակում կլուծվի նաև էքսկլավային գյուղերի հարցը»․ Բայրամով

Շարունակվում են սահմանազատման և սահմանագծման աշխատանքները։ Այդ նպատակով երկու երկրների կողմից ստեղծվել են հատուկ հանձնաժողովներ, որոնք գլխավորում են Ադրբեջանի և Հայաստանի փոխվարչապետները։ Ադրբեջանական լրատվամիջոցների հաղորդմամբ՝ այս մասին լրագրողներին հայտնել է Ադրբեջանի ԱԳ նախարար Ջեյհուն Բայրամովը։

Նախարարը նշել է, որ արդեն կան կատարված աշխատանքի առաջին դրական արդյունքները։ Վերջին տարիներին սահմանազատվել է պետական սահմանի շուրջ 13 կիլոմետրանոց հատված։ Այնուհետև կարճ ժամկետներում հենց այդ նույն տարածքում իրականացվել են սահմանագծման աշխատանքներ։

Բացի այդ, Ադրբեջանն ու Հայաստանը համաձայնեցված կարգով ընդունել և հաստատել են երկու երկրներում մի շարք նորմատիվ իրավական ակտեր, որոնք կարգավորում են հանձնաժողովների գործունեությունը և սահմանում դրանց հետագա աշխատանքը։

«Միևնույն ժամանակ պայմանավորվածություն է ձեռք բերվել շարունակել սահմանազատման գործընթացը հյուսիսից հարավ ուղղությամբ՝ սկսելով Ադրբեջանի և Հայաստանի սահմանագծի՝ Վրաստանի հետ հատման կետից և շարունակելով մինչև Իրանի սահմանը։ Իհարկե, այս գործընթացի շրջանակում կլուծվեն նաև էքսկլավային գյուղերին վերաբերող հարցերը», - հավելել Բայրամովը։