«ԱՄՆ-ն Իրանի հետ լայնածավալ պատերազմի շեմին է»․ #WP

Իրաքում և Հորդանանում ամերիկացի զինծառայողների զոհվելուց հետո ԱՄՆ-ն գտնվում է Իրանի հետ լայնածավալ պատերազմի շեմին, հայտնում է The Washington Post-ը (WP)՝ հղում կատարելով ամերիկացի պաշտոնյային։

Լրատվամիջոցի տվյալներով՝ Փենթագոնը սկսել է ավելացնել Մերձավոր Արևելքում տեղակայված ռազմական ինքնաթիռների թիվը։ Սակայն ԱՄՆ-ի ռազմական գործողությունների ընդլայնումը կարող է դժվարանալ՝ հակաօդային պաշտպանության միջոցների և հեռահար զինամթերքի նվազող պաշարների, ինչպես նաև մարտական վնասների հետևանքով լրացուցիչ զորքեր ու ինքնաթիռներ տարածաշրջան տեղափոխելու սահմանափակ հնարավորությունների պատճառով։ Ավելի վաղ ԱՄՆ Զինված ուժերի Կենտրոնական հրամանատարությունը (CENTCOM) հայտնել էր Հորդանանում ամերիկացի 2 զինծառայողների մահվան մասին։ Ավելի ուշ նույն տարածքում հայտնաբերվել էին ևս մեկ անձի չնույնականացված մնացորդներ։ Նշվում է նաև, որ Իրաքում զոհվել է մեկ զինծառայող, որը վիրավորում էր ստացել իրանական անօդաչու թռչող սարքի հարվածի հետևանքով։

Նախօրեին Wall Street Journal-ը հաղորդել էր, որ ԱՄՆ-ն Եվրոպայից Մերձավոր Արևելք է տեղափոխում լրացուցիչ մարտական ինքնաթիռներ, ինչպես նաև լիցքավորող ինքնաթիռներ: