Լիբանանի բանակը սկսել է տեղակայվել երկրի հարավային շրջաններում

Լիբանանի բանակը սկսել է տեղակայվել երկրի հարավում գտնվող Զավթար ալ-Ղարբիա քաղաքի շրջանում՝ ԱՄՆ-ի հովանավորությամբ «պիլոտային գոտիներ» ստեղծելու ծրագրի շրջանակում, որտեղից իսրայելական զորքերը պետք է դուրս բերվեն, հայտնում է Al Jazeera-ն։

«Բանակի հրամանատարությունը կրկին կոչ է անում քաղաքացիներին չայցելել քաղաք, քանի դեռ այնտեղ անվտանգության հետ կապված իրավիճակը չի կայունացել, ինչպես նաև հորդորում է հետևել զինվորականների ցուցումներին»,- զինված ուժերի հայտարարությունից հատվածներ է մեջբերում լրատվամիջոցը։

Պայմանավորվածությունները նախատեսում են իսրայելական զինուժի փուլային դուրսբերում, ինչպես նաև Լիբանանի զինված ուժերի կողմից «պիլոտային գոտիներում» «Հեզբոլլահ» շարժման ջոկատների զինաթափում։ Բացի Զավթար ալ-Ղարբիա շրջանից, առայժմ «պիլոտային գոտիների» մեջ են ներառվել նաև Ֆրուն և Սրիֆա գյուղերը։

Իսրայելն ու Լիբանանը հունիսի 26-ին Վաշինգթոնում՝ ԱՄՆ-ի միջնորդությամբ, ստորագրել են շրջանակային համաձայնագիր, որը նախատեսում է ռազմական գործողությունների դադարեցում։ Փաստաթղթի համաձայն՝ իսրայելական զորքերը կլքեն Լիբանանի հարավում իրենց ստեղծած անվտանգության գոտին՝ «Հեզբոլլահ»-ի զինաթափումից հետո։