ԱՄՆ Ներկայացուցիչների պալատի հանձնաժողովը Ադրբեջանին կոչ է արել ազատ արձակել հայ գերիներին

ԱՄՆ Ներկայացուցիչների պալատի արտաքին հարաբերությունների հանձնաժողովը 44 կողմ, 7 դեմ ձայների հարաբերակցությամբ հավանություն է տվել H.R. 9087 օրինագծում փոփոխությանը, որով կոչ է արվում անհապաղ և անվերապահորեն ազատ արձակել բոլոր հայ պատանդներին։ Այս մասին հայտնում է Ամերիկայի Հայ դատի հանձնախումբը (ANCA)։ ANCA-ի աջակցությունը ստացած փոփոխությունը ներկայացրել էր Քոնգրեսի Հայկական հարցերով հանձնախմբի փոխնախագահ, քոնգրեսական Բրեդ Շերմանը, որին աջակցել էր Հանձնաժողովի նախագահ Բրայան Մասթը։

«Ես կշարունակեմ պայքարել Ադրբեջանի կողմից անօրինական և անարդարացիորեն պահվող, խոշտանգումների ու բռնությունների ենթարկվող հայերի ազատ արձակման համար»,- ANCA-ին ասել է Շերմանը։

«Ադրբեջանի կողմից հայ պատանդների ազատ արձակումը, Արցախի փախստականների անվտանգ վերադարձը և ադրբեջանական օկուպացիոն ուժերի դուրսբերումը Հայաստանի տարածքից խաղաղության նախապայմաններ են՝ ցանկացած տևական կարգավորման անբաժանելի և չբանակցվող պահանջներ, այլ ոչ թե Բաքվի համար բանակցային խաղաքարտեր՝ Հայաստանին նոր միակողմանի զիջումներ պարտադրելու նպատակով», - նշել է ANCA-ի գործադիր տնօրեն Արամ Համբարյանը։