«Թրամփի մահվան դեպքում անվճար գարեջուր խոստացած գարեջրատունը զրկվել է լիցենզիայից»․ #FoxNews

ԱՄՆ Վիսկոնսին նահանգի կարգավորող մարմինները զրկել են Minocqua Brewing գարեջրատանը գործունեության լիցենզիայից, որի սեփականատերը հայտնի է ԱՄՆ նախագահ Դոնալդ Թրամփի հասցեին բացասական հայտարարություններով։ Այս մասին հայտնում է Fox News-ը։

Որոշումն ուժի մեջ կմտնի օգոստոսի 4-ին։ Դրա հիմք է դարձել ձեռնարկությունում գարեջրի խմբաքանակի հայտնաբերումը, որը, իշխանությունների պնդմամբ, այլ նահանգից էր բերվել առանց անհրաժեշտ թույլտվության և հարկերի վճարման։

Գարեջրատան սեփականատեր, լիբերալ ակտիվիստ Քըրք Բենգստադը հայտարարել է, որ հարկային օրենսդրության ենթադրյալ խախտումները բավարար հիմք չեն իր բիզնեսը փակելու համար։ Նրա խոսքով՝ ինքը «բոլոր հնարավոր միջոցներով» վիճարկելու է այդ որոշումը։

Fox News-ի հաղորդմամբ՝ գարեջրատան սոցցանցի էջերում բազմիցս հրապարակվել են Թրամփի դեմ ուղղված հայտարարություններ, որոնցում, մասնավորապես, «ակնարկներ են եղել, թե Թրամփի սպանության դեպքում հաճախորդներին անվճար գարեջուր կտրամադրեն, թեև նրա անունը ուղղակիորեն չի նշվել»։ Մասնավորապես, ապրիլին՝ Սպիտակ տան մոտ տեղի ունեցած կրակոցներից հետո, գարեջրատունը գրել էր, որ «մենք մոտ ենք անվճար գարեջրի օրվան»։