Թուրքիայում քննարկում են Կարսում Նիկոլայ II-ի որսորդական տնակի վերականգնման հարցը

Այժմյան Թուրքիայի Կարսի նահանգի Սարիղամիշի շրջանում գտնվող Ռուսական կայսրության վերջին միապետ Նիկոլայ II-ի որսորդական տնակի վերականգնումը կարող է զգալի նպաստ բերել տարածաշրջանի զբոսաշրջության զարգացմանը։

Թուրքական «Türkiye» թերթի փոխանցմամբ՝ պատմական այս կառույցը, որը ժողովրդի շրջանում հաճախ անվանում են «Եկատերինայի առանձնատուն», կառուցվել է 1896 թվականին՝ առանց որևէ մեխի օգտագործման։ Հոդվածում նշվում է, որ իր ճարտարապետական առանձնահատկությունների և շրջակա բնության շնորհիվ պատմական հուշարձանը համարվում է տարածաշրջանի «թաքնված գանձերից» մեկը։

Տարիներ շարունակ անուշադրության մատնված «Եկատերինայի առանձնատունը» վերականգնողական աշխատանքների ավարտից հետո կարող է վերածվել մշակութային զբոսաշրջության խոշոր կենտրոնի՝ մեծացնելով Կարսի զբոսաշրջային գրավչությունը։