«Ումերովը կնշանակվի Ուկրաինայի արտաքին հետախուզության ծառայության ղեկավար»․ Զելենսկի

Ուկրաինայի Ազգային անվտանգության և պաշտպանության խորհրդի քարտուղար Ռուստեմ Ումերովը կնշանակվի Ուկրաինայի արտաքին հետախուզության ծառայության նոր ղեկավար։ Այս մասին, ինչպես հայտնում է РБК-Украина-ն, հայտարարել է Ուկրաինայի նախագահ Վլադիմիր Զելենսկին՝ Կիևում Ուկրաինայի դեսպանների մասնակցությամբ խորհրդակցության ընթացքում։

Նրա խոսքով՝ Ռուստեմ Ումերովը կշարունակի համակարգել «Drone Deal» նախաձեռնությունը և ոչ միայն Մերձավոր Արևելքի ուղղությամբ։ «Որպեսզի նա ավելի մեծ հնարավորություններ ունենա միաժամանակ զբաղվելու հենց այսպիսի հարցերով՝ դիվանագիտությամբ, պաշտպանությամբ, Միացյալ Նահանգների, ինչպես նաև այլ առանցքային գործընկերների հետ բանակցային գործընթացով և պատերազմի ավարտի շուրջ բանակցություններով, Ումերովը կնշանակվի Ուկրաինայի արտաքին հետախուզության ծառայության ղեկավար»,- ասել է Զելենսկին։