ԱՄՆ-ն նախատեսում է մինչև սեպտեմբերի 30-ը ավարտել իր զինվորականների դուրսբերումն Իրաքից

ԱՄՆ զինվորականները պատրաստվում են մինչև սեպտեմբերի վերջ դուրս բերել Իրաքից իրենց բոլոր ուժերը, հայտնում է Associated Press-ը։

Գործակալության տվյալներով՝ Իրաքի վարչապետ Ալի ալ-Զաիդին նախօրեին հանդիպել է ԱՄՆ Կենտրոնական հրամանատարության (CENTCOM) հրամանատար, ծովակալ Բրեդ Քուփերի հետ։

Ավելի ուշ Ալ Զաիդին հայտարարել է, որ սեպտեմբերի 30-ը հաստատել է որպես «Իրաքում ԻՊ-ի դեմ պայքարի համար գլոբալ կոալիցիայի ռազմական առաքելության ավարտի և նրա ուժերի դուրսբերման ավարտի հաստատված և վերջնական ամսաթիվ»:

Ամերիկացի պաշտոնյան լրատվամիջոցին հայտնել է, որ ԱՄՆ-ն ակնկալում է զորքերի դուրսբերումն ավարտել մինչև սեպտեմբերի 30-ը, սակայն հրաժարվել է հայտնել, թե քանի զինծառայող է մնում Իրաքում և որտեղ են դրանք վերատեղակայվելու:

«Միացյալ Նահանգները, Իրաքը և կոալիցիոն գործընկերները հսկայական հաջողությունների են հասել ԻՊ-ի ջախջախման գործում, և այժմ Իրաքի անվտանգության ուժերը, ներառյալ «փեշմերգան» և Իրաքյան Քուրդիստանի անվտանգության այլ ուժեր, կգլխավորեն Իրաքում ահաբեկիչների դեմ պայքարը», - ասել է գործակալության զրուցակիցը:

Իրաքի քրդերի երկու ներկայացուցիչներ իրենց հերթին հայտնել են, որ ամերիկյան զորքերի և ռազմական տեխնիկայի դուրսբերումը Էրբիլից սկսվել է մոտ երեք շաբաթ առաջ: