«Գուցե հենց սա է կորցրած հայրենիքի ամենացավոտ իրականությունը». Ջիվան Ավետիսյան

Այսօր, 21:36

Ռեժիսոր Ջիվան Ավետիսյանն իր ֆեյսբուքյան էջում գրել է․ «Ի՞նչ զարմանալի բան է կյանքը…
«Վերածնվածը» ֆիլմի հերոսը գնում է իր արմատների հետևից՝ Արցախ, Գանձասար։ Նա մեկնում է՝ գտնելու իր արմատները և հասկանալու՝ ով է ինքը։
«Ո՞վ եմ ես» հարցի պատասխանը նա պիտի գտնի հենց այնտեղ։
Իսկ մենք՝ ֆիլմը նկարահանելիս, նույն հարցի առաջ էինք կանգնել․ որտե՞ղ գտնենք Գանձասարը։ Ո՞ր եկեղեցին կարող է փոխարինել Գանձասարին էկրանին։
2023 թվականին «Վերածնվածը» նկարահանելն իսկապես ծանր էր։ Մենք փնտրում էինք Գանձասարը, փնտրում էինք Ստեփանակերտը, փնտրում էինք Արցախի այն վայրերը, որոնք այլևս չէինք կարող գնալ… բլոկադա էր…
Գուցե հենց սա է կորցրած հայրենիքի ամենացավոտ իրականությունը․ երբ այլևս չես կարող հասնել իրական վայրին, սկսում ես փնտրել դրա հետքը։
Մենք էլ փնտրում էինք։
Եվ գտանք Մակարավանքը։ Նկարեցինք այնտեղ, և զարմանալիորեն թե՛ վանքը, թե՛ դեպի այն տանող անտառապատ ճանապարհը մեզ հիշեցրին Գանձասարը։
Մեր հերոսը փնտրում էր իր տունը։
Մենք նույնպես։
Փառք Աստծո, որ մենք Մակարավանք ունենք։
Հաջորդ ֆիլմը՝ Գանձասարում»:

Աղբյուրը` Ջիվան Ավետիսյան