Ճապոնիայում մարդիկ ձեռքով տեղափոխել են 360 տոննա կշռող ամրոցի աշտարակը

Հյուսիսային Ճապոնիայում մոտ 1800 մարդ ձեռքով տեղափոխել է Հիրոսակի ամրոցի՝ 360 տոննա կշռող աշտարակը մոտ երկու մետրով՝ այն մոտեցնելով իր պատմական վայրին, գրում է The Guardian-ը։

Աշտարակն ստիպված էին տեղափոխել ուժեղ երկրաշարժից վնասված պատը վերանորոգելու համար։ Մասնակիցները, բաժանված 80 հոգուց բաղկացած խմբերի, քաշել են 30 մետրանոց պարաններ։ Շաբաթ օրը ռելսերի վրա ամրացված կառույցը տեղափոխվել է 1.13 մետր, իսկ կիրակի օրը՝ ևս 1.09 մետր։

Միջոցառման նկատմամբ հետաքրքրությունն այնքան մեծ էր, որ դիմորդների թիվը զգալիորեն գերազանցել է ազատ տեղերի քանակը։ Հիրոսակի քաղաքային այգիների և կանաչ տարածքների վարչության ղեկավար Կենսուկե Հայասակայի խոսքով՝ վերջին երկու օրերի ընթացքում ներկայացվել է մոտ 8000 դիմում 1800 տեղի համար։ Նրա խոսքով՝ դիմումները ստացվել են ոչ միայն տեղի բնակիչներից, այլև Ճապոնիայի և արտերկրի, այդ թվում՝ Հարավարևելյան Ասիայի, Եվրոպայի և Հյուսիսային Ամերիկայի բնակիչներից։ Պատմական կառույցը պահպանելու համար օգտագործվել է ճապոնական ավանդական «հիկիյա» տեխնիկան, որը ենթադրում է շենքերի տեղափոխում անիվների վրա, այլ ոչ թե ապամոնտաժում: «Քանի որ աշտարակը ազգային նշանակության մշակութային ժառանգության վայր է, մենք այն չենք ապամոնտաժել: Մենք օգտագործում ենք հիկիյա՝ շենքերի տեղափոխման մեթոդ, որը Ճապոնիայում գոյություն ունի հնագույն ժամանակներից», - բացատրել է Հայասական։

Աշտարակի՝ ձեռքով տեղափոխումը կշարունակվի մինչև օգոստոսի վերջ: Ակնկալվում է, որ 4100 մարդ այն կտեղափոխի մոտ 5 մետր: Այս ջանքերը խորհրդանշական են և ուղղված են համայնքային համախմբվածության կառուցմանը: Մնացած 73 մետրը կտեղափոխվի մեխանիկորեն։

Հիրոսակի ամրոցի գլխավոր աշտարակը Ճապոնիայում պահպանված 12 նման կառույցներից մեկն է և միակը հյուսիսարևելյան Տոհոկու շրջանում: Ամրոցը, որը ծառայել է որպես Ցուգարու տոհմի նստավայր, ավարտվել է 1611 թվականին: Սկզբնական աշտարակը այրվել է 1627 թվականին՝ կայծակի հարվածից և վառոդի պահեստի բռնկվելուց հետո: Ներկայիս կառույցը վերակառուցվել է 1810 թվականին: