Ուկրաինան կրկին հարվածել է Wildberries-ի պահեստին և ՌԴ նավթավերամշակման գործարաններից մեկին

Գիշերն ուկրաինական անօդաչու թռչող սարքերը զանգվածային հարձակում են իրականացրել Տամբովի մարզի Կոտովսկ քաղաքի ուղղությամբ, հայտնել է տարածաշրջանի ղեկավար Եվգենի Պերվիշովը։ «Հարվածների հետևանքով հրդեհ է բռնկվել Wildberries-ի լոգիստիկ կենտրոնում։ Հրդեհի տարածքը կազմում է ավելի քան 100 հազար քառակուսի մետր»,- գրել է Պերվիշովը՝ թելեգրամյան իր ալիքում։

Նրա տվյալներով՝ պահեստի աշխատակիցներին օպերատիվ կերպով տարհանել են, սակայն աշխատակիցներից մեկը պայթյունի հարվածային ալիքի հետևանքով ուղեղի ցնցում է ստացել։ Պահեստը հարձակման էր ենթարկվել նաև հուլիսի 18-ին։ Այն ժամանակ յոթ մարդ զոհվել էր, ևս 25-ը՝ վիրավորվել։

Գիշերը հարվածի տակ է հայտնվել նաև Նիժնի Նովգորոդի մարզում գտնվող «Նիժեգորոդնեֆտեօրգսինթեզ» նավթավերամշակման գործարանը, գրում է Astra-ն՝ հղում կատարելով ականատեսների տեսանյութերին։ Սա «Լուկօյլ»-ի խոշորագույն գործարանն է՝ Ռուսաստանում հզորությամբ զբաղեցնելով 4-րդ, իսկ բենզինի արտադրությամբ՝ 2-րդ տեղը։