Բիշքեկում մեկնարկել է ՇՀԿ գագաթնաժողովը

Ղրղզստանի մայրաքաղաքում մեկնարկել է Շանհայի համագործակցության կազմակերպության (ՇՀԿ) անդամ երկրների ղեկավարների խորհրդի գագաթնաժողովի հիմնական մասը։ Ղրղզստանի նախագահությունն անցկացվում է «ՇՀԿ 25 տարի. միասին դեպի խաղաղություն, զարգացում և բարգավաճում» կարգախոսով:

Այս նիստից հետո տեղի կունենա «ՇՀԿ+» հանդիպումը։ Ձևաչափը նախատեսում է բարձր մակարդակով բաց նիստի անցկացում՝ կազմակերպության դիտորդ պետությունների և նախագահող երկրի կողմից հրավիրված հյուրերի մասնակցությամբ։

Ինչպես հայտնել էր Ղրղզստանի նախագահի մամուլի ծառայությունը, ՇՀԿ անդամ երկրների առաջնորդներին կմիանան, մասնավորապես, Ադրբեջանի նախագահ Իլհամ Ալիևը, Հայաստանի վարչապետ Նիկոլ Փաշինյանը, Մոնղոլիայի նախագահ Ուխնաագին Խուրելսուխը, Տոգոյի կառավարության ղեկավար Ֆոր Գնասինգբեն, Թուրքիայի նախագահ Ռեջեփ Թայիփ Էրդողանը, Լաոսի նախագահ Թհոնգլուն Սիսուլիթը, Վիետնամի փոխնախագահ Վո Թհի Անի Սուանը և Եգիպտոսի փոխվարչապետ Հուսեյն Իսան։

Հանդիպմանը ներկա կլինեն նաև միջազգային կազմակերպությունների ղեկավարներ, այդ թվում՝ ՄԱԿ-ի, Եվրասիական տնտեսական միության, Հավաքական անվտանգության պայմանագրի կազմակերպության և ԱՊՀ-ի ներկայացուցիչներ։