Թրամփը ցանկանում է կրկին գագաթնաժողով անցկացնել Պուտինի հետ

ԱՄՆ-ի նախագահ Դոնալդ Թրամփը վստահություն է հայտնել, որ ապագայում կրկին գագաթնաժողով կանցկացնի Ռուսաստանի նախագահ Վլադիմիր Պուտինի հետ։ Նա այս հայտարարությունն արել է Օվալաձև աշխատասենյակում կայացած մամուլի ասուլիսում։ ԱՄՆ-ի նախագահը հավելել է, որ ցանկանում է նման գագաթնաժողով անցկացնել, երբ Ուկրաինայում պատերազմը մոտենա ավարտին։
«Ես կարող եմ դա անել անմիջապես։ Ես ուզում եմ դա անել, երբ պատերազմն ավարտվի, և կարծում եմ, որ դա տեղի կունենա... Ես աշխատում եմ նրանց երկուսի [Ռուսաստանի նախագահ Վլադիմիր Պուտինի և Ուկրաինայի նախագահ Վլադիմիր Զելենսկու – խմբ.] հետ, և կարծում եմ, որ նրանք կկանգնեցնեն այն [Ուկրաինայում պատերազմը – խմբ.]», - ասել է Թրամփը։