«Պրոֆեսոր Մոլչանով»-ի կալանման պատճառով Նորվեգիայի դեսպանը կանչվել է ՌԴ ԱԳՆ

Նորվեգիայում ռուսական «Պրոֆեսոր Մոլչանով» նավի կալանումից հետո ՌԴ-ում Նորվեգիայի դեսպան Հայդի Օլուֆսենը կանչվել է Ռուսաստանի արտաքին գործերի նախարարություն։ Այս մասին հայտնել է Ռուսաստանի արտաքին գործերի նախարարության մամուլի ծառայությունը։
Նորվեգիայի դատարանը սեպտեմբերի 2-ին ձերբակալել է «Պրոֆեսոր Մոլչանովին» Շպիցբերգեն կղզեխմբի Բարենցբուրգ նավահանգստում։ Ձերբակալման օրդերը տրվել է ուկրաինական «Նավտոգազի» խնդրանքով։ Ռուսական կողմը մտադիր է բողոքարկել որոշումը։

Արտգործնախարարությունը հայտնել է, որ դեսպանին բողոք է ներկայացվել Նորվեգիայի իշխանությունների գործողությունների վերաբերյալ։ Նախարարությունը նշել է, որ ձերբակալված նավը պատկանում է «Ռոշիդրոմետ»-ի Հիդրոմետոլոգիայի և շրջակա միջավայրի մոնիթորինգի հյուսիսային վարչությանը։ Այն Մուրմանսկից Բարենցբուրգ էր ուղևորվում՝ տեղափոխելով «Արկտիկուգոլ» տրաստի աշխատակիցներին և գիտնականներին։ Ավելին, ինչպես հայտնել է Արտաքին գործերի նախարարությունը, «Պրոֆեսոր Մոլչանովը» անհրաժեշտ պարագաներ էր մատակարարում Բարենցբուրգի և Պիրամիդենի բնակավայրերին։

Ռուսաստանի արտաքին գործերի նախարարությունը, Նորվեգիայում Ռուսաստանի դեսպանատունը և Շպիցբերգենում գլխավոր հյուպատոսությունը կապի մեջ են ռուսական կազմակերպությունների ներկայացուցիչների և Նորվեգիայի իշխանությունների հետ։ Ուղևորներին և անձնակազմին տրամադրվում է անհրաժեշտ օգնություն, այդ թվում՝ հյուպատոսական և իրավաբանական աջակցություն։