Քարահան Թեփեում հայտնաբերվել է 11 հազար տարվա եզակի արձան

Թուրքիայի Շանլըուրֆա նահանգի Քարահան Թեփե հնավայրում հայտնաբերվել է շուրջ 11 հազար տարվա վաղեմության եզակի արձան, որը պատկերում է ընձառյուծի մեջքին նստած մարդու։

Թուրքիայի Մշակույթի և զբոսաշրջության նախարարության հաղորդմամբ՝ գտածոն հայտնաբերվել է 2026 թվականի պեղումների ընթացքում՝ «Ապագային ժառանգություն» նախագծի շրջանակում։ Արձանը մոտ 70 սանտիմետր բարձրություն ունի և, ըստ նախարարության, մինչ այժմ Քարահան Թեփեում նման արձան չէր հայտնաբերվել։
Հատկանշական է, որ արձանը հայտնաբերվել է այն վայրում, որտեղ այն մոտ 11 հազար տարի առաջ տեղադրվել էր։ Այն գտնվել է մոտ 3 մետր տրամագծով շրջանաձև կառույցում, որի հատակը պատված է եղել հարթ քարերով։ Արձանը տեղադրված է եղել կառույցի պատի երկայնքով ձգվող քարե նստարանի վրա։

Քարահան Թեփեն գտնվում է Շանլըուրֆայում՝ Գյոբեքլի Թեփեի մերձակայքում, և ընդգրկված է տարածաշրջանի «Քարե բլուրներ» հնագիտական համալիրում։ Տարածաշրջանը համարվում է վաղ նեոլիթյան հասարակությունների ձևավորման և դրանց մշակույթի ուսումնասիրման կարևոր կենտրոններից մեկը։
Թուրքական Anadolu Agency-ն նույնպես հայտնել է գտածոյի մասին՝ ընդգծելով, որ մարդու և կենդանու համադրությամբ այս 70-սանտիմետրանոց արձանը առանձնանում է իր աննախադեպ ոճով։