ԱՄՆ-ն արգելել է Կանադայից կաթնամթերքի, ալկոհոլային խմիչքների ներմուծումը

ԱՄՆ նախագահ Դոնալդ Թրամփը ստորագրել է մի շարք հրամանագրեր, այդ թվում՝ Կանադայից մոտոցիկլետների, կաթնամթերքի, ոչ ալկոհոլային գարեջրի և մի շարք ալկոհոլային խմիչքների ներմուծումն արգելելու մասին։

«Կանադայից որոշ ապրանքներ, որոնք նշված են սույն հայտարարության հավելվածում, 2026 թվականի սեպտեմբերի 29-ի՝ արևելյան ժամանակով ժամը 00:01-ից չեն կարող ներմուծվել Ամերիկայի Միացյալ Նահանգներ»,- ասվում է Սպիտակ տան կայքում հրապարակված փաստաթղթում։

Բացի այդ, սեպտեմբերի 15-ից ԱՄՆ վարչակազմը լրացուցիչ 50 տոկոսանոց մաքսատուրքեր է սահմանում կանադական պանրի, պողպատի, ալյումինի, թղթի, կահույքի, լուսատուների և այլ ապրանքների նկատմամբ։ Սպիտակ տունը նաև վերանայել է արդեն գործող մաքսատուրքերը։

Նշենք, որ երեկ ուժի մեջ են մտել ԱՄՆ-ից Կանադա արտահանվող որոշ ապրանքների նկատմամբ Կանադայի սահմանած մաքսատուրքերը։ Այդ միջոցները պատասխանն էին օգոստոսի 22-ին կանադական որոշ ապրանքների նկատմամբ ԱՄՆ-ի սահմանած 50 տոկոսանոց մաքսատուրքերի ուժի մեջ մտնելուն։ Դրան նախորդել էր Օտտավայի և Վաշինգթոնի միջև առևտրային բանակցությունների ձախողումը։