Վրաստանում ձերբակալել են նախկին պետնախարար Գեորգի Բարամիձեին

Վրաստանի գլխավոր դատախազությունը պետական դավաճանության և դիվերսիայի մեղադրանքով ձերբակալել է ընդդիմադիր «Միացյալ ազգային շարժում» կուսակցության առաջնորդներից մեկին, նախկին փոխվարչապետ և պաշտպանության նախկին նախարար Գեորգի Բարամիձեին։ Այդ մասին ճեպազրույցի ժամանակ հայտնել է գլխավոր դատախազի տեղակալ Ամիրան Գուլուաշվիլին։

Նրա խոսքով՝ ձերբակալության հիմք է դարձել Բարամիձեի մեկ ամիս առաջ արած հրապարակային հայտարարությունը, ըստ որի՝ 1992-1993 թվականների աբխազական հակամարտության ընթացքում վրացի զինծառայողները գերի չէին վերցնում հակառակորդի զինվորներին և տեղում գնդակահարում էին նրանց։

«Աբխազական հակամարտության վետերանների կողմից դատախազություն ներկայացված բողոքից հետո սկսվել է քննություն, որի ընթացքում Բարամիձեի ներկայացրած փաստերը չեն հաստատվել», - ասել է գլխավոր դատախազի տեղակալը։

Նա նշել է, որ առաջիկա 48 ժամվա ընթացքում դատախազությունը Բարամիձեին պաշտոնապես մեղադրանք կներկայացնի և գործը կփոխանցի դատարան։