«Չենք կարող թույլ տալ, որ ԱՄՆ-ի արտաքին քաղաքականությունը Մերձավոր Արևելքում ենթարկվի Իսրայելին»․ Վենս

ԱՄՆ փոխնախագահ Ջեյ Դի Վենսը հայտարարել է, որ Վաշինգթոնը չի կարող թույլ տալ, որպեսզի «Մերձավոր Արևելքի հարցում իր արտաքին քաղաքականությունը ենթարկվի Իսրայելին»։ Վենսն այս մասին ասել է «All-In Podcast»-ի կազմակերպած համաժողովում:

«Ակնհայտ է, որ Իսրայելը կարևոր գործընկեր է ռազմական տեխնոլոգիաների և հետախուզական տվյալների փոխանակման հարցերում, սակայն երբեմն ԱՄՆ-ն համաձայն չի լինում Իսրայելի հետ»,- նշել է նա։ «Դոնալդ Թրամփը վերջին 40 տարիների այն նախագահն է, որը պատրաստ է եղել ասել․ «Գիտեք ինչ, այո՛, Բիբին (Իսրայելի վարչապետ Բենիամին Նեթանյահու) լավ գործընկեր է, բայց ես ու Բիբին այս հարցում տարբեր կարծիքներ ունենք», կամ՝ «Բիբին այս հարցում սխալվում է», կամ գուցե՝ «Իսրայելի տեսանկյունից Բիբին այս հարցում ճիշտ է, բայց ամերիկյան ժողովուրդը պահանջում է, որ մենք այլ ուղղությամբ շարժվենք»։