«Հայերը ձգտում են յուրացնել Կովկասյան Աղվանքի պատմությունը»․ Ֆարիդ Շաֆիև

Հայերը ձգտում են «հայացնել Կովկասյան Աղվանքի պատմությունը»։ Ադրբեջանական լրատվամիջոցների հաղորդմամբ՝ այս մասին հայտարարել է Միջազգային հարաբերությունների և բազմամշակութայնության վերլուծության կենտրոնի կառավարման խորհրդի նախագահ Ֆարիդ Շաֆիևը՝ Ադրբեջանի պետականության պատմության մեջ Կովկասյան Աղվանքի ժառանգությանը նվիրված միջոցառման ժամանակ։

«Ադրբեջանի տարածքում գոյություն են ունեցել մի շարք պետություններ, և դրանցից յուրաքանչյուրն իր որոշակի հետքն է թողել մեր պետականության, մեր ազգային ինքնության մեջ։ Այս հարցերը պետք է համակողմանիորեն ուսումնասիրվեն, այս ուղղությամբ աշխատանք է տարվում, գրքեր են թարգմանվում և այլն։ Սակայն փորձը ցույց է տալիս, որ այս ոլորտում ցանկացած բաց կարող է օգտագործվել»,— ասել է Շաֆիևը։

Նա նաև մեկնաբանել է Արցախի եկեղեցիների աղվանականացման վերաբերյալ վերջին հայտարարությունները։ «Դա չի համապատասխանում իրականությանը։ Ադրբեջանի տարածքում գտնվում են տարբեր ժողովուրդների և կրոնական համայնքների պատկանող պատմական պաշտամունքի կառույցներ, և մեր երկիրը ուշադրություն է դարձնում այդ հուշարձանների պահպանությանը։ Հայերը փորձում են ժխտել Կովկասյան Աղվանքի պատմությունը։ Այսինքն՝ նրանք ձգտում են այն ամբողջությամբ հայացնել։ Նրանց նպատակն է հայտարարել, թե այստեղ իբր գոյություն է ունեցել «Մեծ Հայք»։ Կովկասյան Աղվանքի պատմությունը որոշակիորեն հերքում է «Մեծ Հայքի» մասին այդ գաղափարը։ Նրանք դա տեսնում են և չեն ցանկանում ընդունել»,- նշել է Շաֆիևը։