Դատարանը վերջին պահին դադարեցրել է կնոջ մահապատիժը, որը առաջինն էր լինելու Թենեսիում վերջին 200 տարվա ընթացքում 

ԱՄՆ-ի դաշնային դատարանը կասեցրել է Քրիստա Փայքի մահապատիժը, ով կարող է դառնալ Թենեսիում 200 տարվա ընթացքում մահապատժի ենթարկված առաջին կինը, հաղորդում է The New York Times-ը։

50-ամյա Փայքը պետք է մահապատժի ենթարկվեր մահացու ներարկման միջոցով սեպտեմբերի 30-ին, ժամը 10:00-ին, Նեշվիլի խիստ ռեժիմի բանտում։ Մահապատժից մի քանի ժամ առաջ դատարանը որոշում է կայացրել դադարեցնել մահապատիժը, մինչև կքննարկվեն մահապատժի դատավճիռը չեղյալ համարելու լրացուցիչ փաստարկներ։

Այս որոշումը կայացվել է Փայքի փաստաբանների շնորհիվ։ Փայքը պատիժ է կրում 1995 թվականին կատարված կանխամտածված սպանության համար։ Այդ ժամանակ նա 18 տարեկան էր։ Նրա փաստաբանները պնդում են, որ Փայքը հանցագործությունը կատարել է մանկության տարիներին սեռական բռնության հետևանքով առաջացած հոգեկան առողջության խնդիրների պատճառով։ Ձերբակալությունից հետո Փայքի մոտ իսկապես ախտորոշվել է հետտրավմատիկ սթրեսային խանգարում և երկբևեռ խանգարում։ Նրա պաշտպանության թիմը նշում է, որ դատարանը չի դիտարկել Փայքի հանդեպ բռնության մասին ցուցմունքները՝ որպես լրացուցիչ ապացույց։ ԱՄՆ-ի Վեցերորդ շրջանի վերաքննիչ դատարանի կազմը բացատրել է, որ ապացույցները վերլուծելու համար անհրաժեշտ է «կարճ դադար»։