«Հայաստանի հետ փաստացի խաղաղությունը դեռ չի նշանակում խաղաղության գործընթացի ավարտ»․ Էլչին Ամիրբեկով

«Ադրբեջանը շարունակում է Հայաստանից ակնկալել քայլեր՝ խաղաղության պաշտոնական ձևակերպման ճանապարհին առկա լուրջ խոչընդոտը վերացնելու համար։ Երկու երկրների միջև հարաբերությունների կարգավորման հարցում արձանագրված առաջընթացը և առկա փաստացի խաղաղությունը դեռևս չեն նշանակում խաղաղության գործընթացի ավարտ»։ Ադրբեջանական լրատվամիջոցների հաղորդմամբ՝ այս մասին հայտարարել է Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը՝ Ֆինլանդիա աշխատանքային այցի շրջանակում բարձր մակարդակի հանդիպումների ընթացքում։

Ամիրբեկովը նշել է, որ խաղաղության պաշտոնական ձևակերպումն անհրաժեշտ է դրա կայուն և անշրջելի բնույթն ապահովելու համար։ Բանակցությունների ընթացքում նա զրուցակիցներին մանրամասն տեղեկացրել է Ադրբեջանի և Հայաստանի միջև հարաբերությունների կարգավորման ներկայիս վիճակի, հեռանկարների և դրական դինամիկայի մասին։ Նշվել է, որ ձևավորված դե ֆակտո խաղաղությունն արդեն շոշափելի գործնական արդյունքներ է տալիս, այդ թվում՝ տնտեսական համագործակցության և երկկողմ առևտրի ընդլայնման տեսքով։ Սա նպաստում է վստահության ամրապնդմանը և խաղաղության մթնոլորտի ձևավորմանը։