«Բեկում հնարավոր է միայն Զելենսկու և Պուտինի հանդիպումից հետո»․ Սիբիհա

Խաղաղության բանակցություններում բեկում հնարավոր է միայն Վլադիմիր Զելենսկու և Վլադիմիր Պուտինի հանդիպումից հետո։ Այս մասին հայտարարել է Ուկրաինայի ԱԳ նախարար Անդրիյ Սիբիհան՝ РБК-Украина-ին տված հարցազրույցում։

Լրագրողի հարցին, թե արդյոք Ուկրաինայի, ՌԴ-ի և ԱՄՆ-ի միջև եռակողմ հանդիպումը մնում է օրակարգում և երբ այն կարող է տեղի ունենալ, Սիբիհան պատասխանել է, որ Կիևը մշտապես հաստատել է իր պատրաստակամությունը նման հանդիպման համար։ «Մենք կցանկանայինք, որ այն տեղի ունենա որքան հնարավոր է շուտ։ Մենք կօգտագործենք յուրաքանչյուր հնարավորություն, նույնիսկ ամենափոքրը՝ խաղաղությունը մոտեցնելու համար»,- ասել է ԱԳ նախարարը։

Նրա կարծիքով՝ խաղաղության հասնելու ջանքերում նոր կամ որակապես նոր դինամիկա ապահովելու ամենաարդյունավետ և ճիշտ քայլը Պուտինի և Զելենսկու հանդիպումը կլինի։ «Կամ Թրամփի մասնակցությամբ, կամ Թուրքիայի նախագահ Էրդողանի միջնորդությամբ։ Մենք այդ մասին ազդակներ ենք ուղարկում և պատրաստ ենք հանդիպմանը»,- հավելել է Սիբիհան։