Ռուսական ուժերը հարվածներ են հասցրել Կիևին և Խարկովին․ կան զոհեր

Գիշերը ռուսական զորքերը կրկին հարվածներ են հասցրել Ուկրաինայի քաղաքներին։ Կիևում մասնակիորեն ավերվել է բազմահարկ բնակելի շենք։ Փրկարարները փլատակների տակից դուրս են բերել երկու մարմին։

Խարկովի մարզի Կորոտիչ ավանում անօդաչու թռչող սարքերը հարվածել են առանձնատներից մեկին։ Զոհվել են տան 81-ամյա և 83-ամյա բնակիչները։ Եվս 11 մարդ վիրավորվել է, այդ թվում՝ երկու ամսական տղա և ութամյա աղջիկ։

Պոլտավայի մարզի Կրեմենչուգ քաղաքում Ռուսաստանի հարվածի հետևանքով հրդեհ է բռնկվել Միխայիլ Օստրոգրադսկու անվան համալսարանի տարածքում գտնվող ուսումնական մասնաշենքի հինգերորդ հարկում։ Ուկրաինայի արտակարգ իրավիճակների պետական ծառայության նախնական տվյալներով՝ երեք մարդ է տուժել։ Պոլտավայում հրետակոծության հետևանքով հրդեհներ են բռնկվել նաև վարչական շենքում և պահեստային տարածքում։

Զապորոժիեի մարզային վարչակազմի ղեկավար Իվան Ֆեդորովի հաղորդմամբ՝ Զապորոժիեի և համանուն շրջանի ուղղությամբ ռուսական հարձակումների հետևանքով մեկ մարդ զոհվել է, ևս վեցը՝ վիրավորվել։

Օդեսայի մարզային վարչակազմի ղեկավար Օլեգ Կիպերը նույնպես հայտնել է ռուսական անօդաչու թռչող սարքերի հարձակման մասին։ Վնասվել են էներգետիկ ենթակառուցվածքների օբյեկտներ և սննդի արդյունաբերության մասնավոր ձեռնարկություն։