«Առանց ԱՄՆ-ի օգնության՝ Ուկրաինան այսօր գոյություն չէր ունենա»․ Ռուբիո

ԱՄՆ պետքարտուղար Մարկո Ռուբիոյի պնդմամբ՝ Ուկրաինան առանց Վաշինգթոնի աջակցության չէր կարողանա պահպանել իր գոյությունը։

«Եթե ​​չլիներ Միացյալ Նահանգների օգնությունը՝ այդ թվում Թրամփի վարչակազմի օրոք, ապա այսօր Ուկրաինան չէր լինի։ Որպես ինքնիշխան պետություն՝ Ուկրաինան գոյություն չէր ունենա։ Սա, իհարկե, չի նշանակում, թե չպետք է ընդգծել ուկրաինացի մարտիկների քաջությունը. նրանք իսկապես շատ խիզախորեն են պայքարել իրենց երկրի համար և, ստացած օգնության շնորհիվ, իրականացրել են բացառիկ գործողություններ՝ դիմակայելով մի մեծ՝ շատ ավելի մեծ երկրի։ Սակայն եկեք հստակ արձանագրենք. այսօր Ուկրաինան չէր լինի, եթե չլիներ Միացյալ Նահանգների կողմից Ուկրաինային տրամադրված միլիարդավոր դոլարների աջակցությունը՝ սկսած Բայդենի վարչակազմից և շարունակվելով նաև ներկայիս վարչակազմի օրոք»,- նշել է նա՝ մեկնաբանելով The Wall Street Journal-ի հրապարակումը, ըստ որի՝ SpaceX-ի հիմնադիր Իլոն Մասկը կարող էր մասնակցություն ունենալ Ուկրաինայում Starshield արբանյակային կապի համակարգի աշխատանքի սահմանափակմանը։ Ռուբիոյի խոսքով՝ ԱՄՆ նախագահ Դոնալդ Թրամփի վարչակազմը նման սահմանափակումներ մտցնելու հրահանգ չի տվել։

ԱՄՆ պետքարտուղարը նշել է, որ ներկայումս շատ բարդ բանակցություններ են ընթանում՝ արդեն հինգերորդ տարին շարունակվող պատերազմն ավարտելու շուրջ։ Դրանք կենտրոնացած են Ուկրաինայի արևելքում գտնվող Դոնբասի ճակատագրի վրա։ Փոխըմբռնման հասնելու համար կողմերն արդեն մի քանի գաղափար են առաջարկել։

«Երկու կողմերն էլ ստիպված կլինեն ինչ-որ բանից հրաժարվել. բանակցությունները բարդ են։ Կարծում եմ՝ Ուկրաինայի գլխավոր ցանկությունն է երկարաժամկետ անվտանգության երաշխիքներ ապահովել, որպեսզի նրա վրա այլևս երբեք հարձակում չգործեն»,- ասել է Ռուբիոն։