Վենեսուելայի ընդդիմության առաջնորդ Մարիա Մաչադոն վերադարձել է հայրենիք

Վենեսուելայի ընդդիմության առաջնորդ Մարիա Կորինա Մաչադոն վերադարձել է հայրենիք՝ ավելի քան 10 ամիս աքսորում գտնվելուց հետո։ «Ես այստեղ եմ։ Ձեզ հետ եմ»,- գրել է Մաչադոն՝ X սոցիալական ցանցում։

Reuters-ը գրում է, որ նրա վերադարձը համաձայնեցվել է ԱՄՆ-ի, Պանամայի և Կոլումբիայի կառավարությունների հետ։ Աղբյուրների տվյալներով՝ Մաչադոն մասնավոր ինքնաթիռով Պանամայից մեկնել է Կոլումբիա, իսկ կիրակի օրը ցամաքային ճանապարհով հատել է Վենեսուելայի սահմանը։ Նրա տեղաշարժերին ծանոթ աղբյուրը հայտնել է, որ թռիչքը տեղի է ունեցել անցած շաբաթվա վերջին, որի ընթացքում նրան ուղեկցել են անվտանգության ամերիկյան ընկերության աշխատակիցները։ Նույն աղբյուրի խոսքով՝ ԱՄՆ-ն Վենեսուելայի իշխանություններին տեղեկացրել է Մաչադոյի վերադարձի մասին՝ նախազգուշացնելով չմիջամտել տեղի ունեցողին և չձեռնարկել նրա անվտանգությանը սպառնացող գործողություններ։

Մաչադոն Վենեսուելայից հեռացել է 2025 թվականի վերջին։ Նա գաղտնի լքել է երկիրը՝ Նոբելյան Խաղաղության մրցանակը ստանալու համար՝ չնայած իշխանությունների սահմանած արգելքին։