«Ուկրաինան արդեն մեկ ամիս է՝ սպասում է Patriot և NASAMS հրթիռների մատակարարման վերաբերյալ Հեգսեթի ստորագրությանը»․ Զելենսկի

Ուկրաինայի նախագահ Վլադիմիր Զելենսկին հայտարարել է, որ Ուկրաինան արդեն գրեթե մեկ ամիս է սպասում է Փենթագոնի ղեկավար Փիթ Հեգսեթի ստորագրությանը՝ կապված Patriot և NASAMS հակաօդային պաշտպանության համակարգերի համար նախատեսված հրթիռների հետ, և հանձնարարել է այս հարցը կրկին քննարկել ամերիկյան կողմի հետ։

Նա նաև հայտնել է, որ անցկացրել է խորհրդակցություն՝ նվիրված գործընկերներից զենքի մատակարարումների և ռուսական հարվածներից հետո էներգետիկ համակարգի վերականգնման հարցերին։ Պաշտպանության նախարարը, Ուկրաինայի զինված ուժերի գլխավոր հրամանատարը և արտաքին գործերի նախարարը զեկուցել են ուկրաինական հակաօդային պաշտպանության համակարգերի համար նախատեսված որսացող հրթիռների մատակարարումների մասին։ Զելենսկու խոսքով՝ Ուկրաինան համագործակցում է ԱՄՆ-ի, եվրոպական երկրների և այլ գործընկերների հետ, որոնք ունեն PAC-2 և PAC-3 հրթիռների պաշարներ։

Խորհրդակցության մասնակիցներն առանձին քննարկել են նաև նոյեմբերին «Ռամշտայն» ձևաչափով նախատեսված հանդիպման նախապատրաստական աշխատանքները։ Զելենսկին նշել է այն որոշումների կատարման գործընթացն արագացնելու անհրաժեշտությունը, որոնց իրագործմանը սպասում են արդեն որոշ ժամանակ։

«Աջակցության յուրաքանչյուր փաթեթ մարդկանց կյանքերը պաշտպանելու հնարավորություն է»,- նշել է նա։