Կարեն Ասրյանի հուշամրցաշարի հաղթողի անունը կորոշվի վերջին տուրում

Երեկ տեղի ունեցավ Կարեն Ասրյանի հուշամրցաշարի 8-րդ տուրը: Տուրի երկու կենտրոնական պարտիաներում միմյանց դեմ մրցում էին Հրանտ Մելքումյանը ու Կրիշնան Սաշիկիրիանը և Զավեն Անդրիասյանը ու Սետուրամանը: Առաջին խաղատախտակի վրա Մելքումյանը հաղթանակի հասնելու համար դիմեց չափազանց մեծ ռիսկի և արդյունքում պարտվեց: Անդրիասյան – Սետուրաման պարտիան դարձավ տուրում, ինչպես նաև ամբողջ մրցաշարում ամենաերկարը: Սպիտակներով հանդես եկող մեր շախմատիստը ուներ որոշակի առավելություն, սակայն Հնդկաստանը ներկայացնող գրոսմայստերը պաշտպանվեց շատ հստակ և 128 քայլ և 6 ժամից ավել տևած պարտիան ավարտվեց հաշտությամբ: Նախավերջին տուրում կարևոր հաղթանակ տոնեց Հայաստանի չեմպիոն և Կարեն Ասրյանի հուշամրցաշրի նախորդ տարվա հաղթող Հայկ Մարտիրոսյանը. Հայաստանի գործող չեմպիոնը հեշտորեն առավելության հասավ Բելառուսը ներկայացնող գրոսմայստեր Կիրիլ Ստուպակի նկատմամբ:

Այսպիսով, վերջին տուրից առաջ Հայկ Մարտիրոսյանը, Կրիշնան Սաշիկիրանը և Սետուրամանը վաստակել են 6-ական միավոր և գլխավորում են աղյուսակը:

Հրանտ Մելքումյանը, Ռինատ Ջումաբաևը, Զավեն Անդրիասյանը, Մանուէլ Պետրոսյանը, Սամվել Տեր-Սահակյանը, Հովհաննես Գաբուզյանը, Անդրեյ Ժիգալկոն և Արամ Հակոբյանը իրենց ակտիվում ունեն 5.5-ական միավոր: Այս բոլոր շախմատիստները պահպանում են մրցաշարի հաղթող դառնալու տեսական հնարավորություն:

Վերջին տուրի կենտրոնական պարտիաներում միմյանց դեմ կմրցեն Հնդկաստանի հավաքականի անդամներ Կրիշնան Սաշիկիրանը և Սետուրամանը ու Հայաստանի հավաքականի անդամներ Հայկ Մարտիրոսյանը և Հրանտ Մելքումյանը: