«Բոլոր ակումբներն ինձ առաջադրել են ՀՖՖ-ի նախագահի պաշտոնում». Արթուր Վանեցյան

451

Երեքշաբթի, 04 սեպտեմբերի, 2018 թ., 13:40

ՀՀ Ազգային անվտանգության ծառայության տնօրեն Արթուր Վանեցյանն այսօր լրագրողների հետ զրույցում հայտարարել է, որ ՀՖՖ անդամներն իր թեկնածությունն են առաջադրել ՀՖՖ նախագահի ընտրություններին, որոնք կայանալու են սեպտեմբերի 22-ին:

«Ես չեմ առաջադրվել ՀՖՖ նախագահի պաշտոնում, այլ բոլոր ակումբներն են առաջադրել։ Այդ աշխատանքն ինձ բացարձակ չի խանգարի ԱԱԾ-ի տնօրենի աշխատանքին։ Ժամանակը ցույց կտա, կտեսնեք, որ չի խանգարի։ Ո՛չ ազգային անվտանգությունը կտուժի, ո՛չ էլ Հայաստանի ֆուտբոլի ֆեդերացիան: Ծրագրերն ընտրությունների օրը կներկայացնեմ, ոլորտը նախնական ուսումնասիրել եմ, առաջնահերթությունը համարում եմ մասսայական ֆուտբոլի և մանկապատանեկան ֆուտբոլի զարգացումը։ ՀՖՖ-ն բավականին ինքնաբավ կազմակերպություն է, ֆինանսների արդյունավետ օգտագործման դեպքում կարող ենք հաջողությունների հասնել։ Ակումբների ղեկավարների հետ երեկ հանդիպել եմ, զրուցել։ Փոփոխություններ են սպասվում ՀՖՖ-ի ներսում»,- նշել է նա։