ՀԱՊԿ անդամ բոլոր երկրները, բացի Հայաստանից, ստորագրել են գլխավոր քարտուղարի պաշտոնում Զասին նշանակելու որոշման նախագիծը

Հավաքական անվտանգության պայմանագրի կազմակերպության (ՀԱՊԿ) անդամ 6 երկրներից 5-ը ստորագրել է Բելառուսի Անվտանգության խորհրդի ղեկավար Ստանիսլավ Զասին կազմակերպության գլխավոր քարտուղարի պաշտոնում նշանակելու որոշման նախագիծը: Այս մասին «Коммерсант»-ին ասել է կազմակերպության մամուլի քարտուղար Վլադիմիր Զայնետդինովը:

«ԶԼՄ-ներում հայտնված տարբեր հաղորդագրությունների և իրավիճակի հետ կապված պարզաբանում ենք, որ գլխավոր քարտուղարի պաշտոնին Բելառուսի ներկայացուցչի թեկնածության համաձայնեցման գործընթացը կազմակերպվել է ՀԱՊԿ անդամ պետությունների ղեկավարների հետ անձնական հանդիպման ճանապարհով»,- ասել է նա:

Զայնետդինովը հայտնել է, որ դեկտեմբերի 12-20-ը նման հանդիպումներ են կայացել Ղրղզստանի, Ղազախստանի, Տաջիկստանի, Բելառուսի և Ռուսաստանի նախագահների հետ, ովքեր հավանություն են տվել Զասի թեկնածությանը:

«ՀՀ վարչապետի պաշտոնակատար Նիկոլ Փաշինյանի հետ հանդիպումը հետաձգվել է»,- նշել է ՀԱՊԿ մամուլի քարտուղարը: