Բռնցքամարտի Հայաստանի երիտասարդական առաջնության ընթացքում բողոքարկման 10 դիմում է ներկայացվել

647

Երկուշաբթի, 04 մարտի, 2019 թ., 21:20

Փետրվարի 26-ից մարտի 3-ը «Դինամո» ՄՀԿ-ում կայացավ բռնցքամարտի Հայաստանի երիտասարդական առաջնությունը, որին մասնակցեց շուրջ 150 բռնցքամարտիկ՝ Հայաստանի տարբեր մարզերից և Արցախից: Այս մասին հայտնում է ֆեդերացիայի մամուլի ծառայությունը։ Մրցումային 6 օրվա ընթացքում տեղի ունեցավ 140 մենամարտ: Երկարատև դադարից հետո՝ ԱԻԲԱ-ի կանոնադրության համաձայն, Հայաստանի առաջնությունում մարզիչները հնարավորություն ունեցան բողոքարկել մենամարտը:
Առաջնության ընթացքում մրցավարական հանձնաժողովին ներկայացվել է բողոքարկման 10 դիմում:

Վերանայելուց հետո փոխվել է 5 մենամարտի արդյունք: Առաջնության գլխավոր մրցավար Սեյրան Ղամբարյանը ՀԲՖ մամուլի ծառայության հետ զրույցում դրական է գնահատել մրցավարական գործողությունները. «Շատ դրական եմ ընդունում այն, որ արդեն հնարավորություն կա մենամարտերը բողոքարկելու: Մարդկանց հաղթելու ցանկությունն այնքան մեծ է լինում, որ չեն ցանկանում տեսնել իրականը: Մի քանի վիճելի մենամարտեր եղան, սակայն մրցավարական ստուգիչ հանձնաժողովը լուծում տվեց հարցին»,- նշել է Ղամբարյանը:

Նշենք նաև, որ ՀԲՖ-ն կհրապարակի բոլոր վիճելի մենամարտերի տեսանյութերը: