«Ադրբեջանի կողմից չզգուշացված լայնածավալ զորավարժությունների անցկացումը ԵԱՀԿ հանձնառության խախտում է». Աննա Նաղդալյան

ԱԳՆ խոսնակ Աննա Նաղդալյանն այսօր ճեպազրույցում պատասխանելով հետևյալ հարցին, թե Ադրբեջանը հերթական լայնածավալ գործողություններն է իրականացնում և որոշակի թվաքանակի դեպքում պետք է հայկական կողմին տեղյակ պահվեր, ինչը չի արվել, և թե Հայաստանն իրազեկո՞ւմ է այդ մասին միջազգային կառույցներին և ի՞նչ վտանգներ է այն պարունակում, նշեց, որ լայնածավալ զորավարժությունների մասին նախապես իրազեկումը դա ԵԱՀԿ հանձնառություն է և նա պետք է տեղյակ պահեր ոչ թե հայկական կողմին, այլ համապատասխան կառույցին, որը ԵԱՀԿ-ն է: «Այս անգամ Ադրբեջանի կողմից նախապես չզգուշացված լայնածավալ զորավարժությունների անցկացումը ԵԱՀԿ հանձնառության խախտում է և այն չի նպաստում տարածաշրջանում խաղաղության ու վստահության մթնոլորտի ձևավորմանը»,- ասաց խոսնակը՝ նշելով, որ վաղը հարցը բարձրացվելու է ԵԱՀԿ-ի շրջանակներում՝ հայկական պատվիրակության կողմից:

«Բականաբար, ռազմական ուժի նմանօրինակ գործողությունները չեն նպաստում խաղաղության մթնոլորտի ձևավորման ադրբեջանական հանձնառության իրականացմանը, որը վերջերս ամրագրվել էր Վիեննայում կայացած գագաթնաժողովի ժամանակ: Մենք վստահ ենք մեր ուժերին և առաջին հերթին ապավինում ենք հենց մեր ուժերին, ինչը թույլ է տալիս հանդես գալ խաղաղության դիրքերից»,- ասաց Ա. Նաղդալյանը: