«Չելսի»-ն, հաղթելով «Արսենալ»-ին, նվաճեց Եվրոպայի լիգայի գավաթը

Բաքվի «Օլիմպիական» մարզադաշտում ավարտվեց Եվրոպայի լիգայի եզրափակիչ «Չելսի»-«Արսենալ» հանդիպումը։ «Չելսի»-ն 4։1 հաշվով հաղթեց «Արսենալ»-ին և նվաճեց գավաթը։

Հանդիպման 49-րդ րոպեին խաղի հաշիվը բացեց «Չելսի»-ի հարձակվող Օլիվյե Ժիրուն, ապա նրա թիմակից Պեդրոն, հանդիպման 60-րդ րոպեին, կրկնապատկեց հաշիվը։ 5 րոպե անց Էդեն Ազարն արդեն 3-րդ գնդակն ուղարկեց «Արսենալ»-ի դարպասը։ 4 րոպե անց՝ հանդիպման 69-րդ րոպեին, «Արսենալ»-ի կիսապաշտպան Ալեքս Իվոբին կրճատեց հաշվի տարբերությունը՝ 1։3, սակայն ևս 3 րոպե անց Ազարը դուբլ ձևակերպեց՝ «Արսենալ»-ի դարպասն ուղարկելով 4-րդ գնդակը։

Հիշեցնենք, որ Հայաստանի ազգային հավաքականի և «Արսենալ»-ի կիսապաշտպան Հենրիխ Մխիթարյանը չի մեկնել Բաքու՝ անվտանգության նկատառումներից ելնելով։