«Հուսով եմ՝ այս առաջնությունից հետո որոշ հայ ֆուտբոլիստներ կտեղափոխվեն Եվրոպա». Մխիթարյան

Հայաստանի ազգային հավաքականի ավագ և Մ19 ԵՎՐՈ-2019-ի դեսպան Հենրիխ Մխիթարյանը խոսել է մրցաշարի մասին. «Միշտ էլ հաճելի է ու նաև պատասխանատու, քանի որ ներկայացնում ենք Հայաստանն ու մարդկանց ցույց ենք տալիս, թե ինչ է նշանակում հայ լինելը, Հայաստանում ապրելը և Հայաստանի հավաքականում խաղալը:

Ինձ թվում է՝ շատ լավ միջոցառում է լինելու ու մեր ֆուտբոլիստները պատվով հանդես կգան:

Երբ ես էի այդ տարիքում, ամբողջ տարի սպասում էինք, թե երբ ենք միջազգային խաղերի մասնակցելու, որպեսզի հաճույք ստանանք, քանի որ ուժեղ հավաքականների դեմ խաղալը միշտ էլ հաճելի է: Կարողանում ես հասկանալ, թե որ մակարդակի վրա ես գտնվում, հասկանում ես քո ուժեղ և թույլ կողմերը: Նաև միշտ հաճելի էր տեսնել, թե ինչ աստղեր են խաղում քո դեմ, որոնք հետագայում կխաղան շատ բարձրակարգ թիմերում:

Միշտ սպասել եմ ու մեծ պատասխանատվությամբ եմ մոտեցել այդ խաղերին»,- նշել է նա։

Անդրադառնալով վիճակահանության արդյունքներին՝ Մխիթարյանն ասել է․ «Երևի բոլորը դժգոհ են վիճակահանությունից, քանի որ, կարելի է ասել, ամենաուժեղ մրցակիցների հետ միևնույն խմբում են ընդգրկվել, չնայած՝ չկան թույլ մրցակիցներ: Բայց մեր տղաները պետք է խաղան, պետք է ցույց տան, որ իրենք արժանի են խաղալ այդ հավաքականների դեմ:

Վախենալու ոչինչ չկա. բոլորն էլ ֆուտբոլիստ են, բոլորն էլ մարդ են: Միակ բանը, որ նրանք կարող են անել՝ խաղալ բարձր մակարդակով, իրենց ուժերի չափով ու բոլորին ցույց տալ, որ իրենք կարող են խաղալ բարձր մակարդակով: Հուսով եմ՝ այս առաջնությունից հետո որոշ հայ ֆուտբոլիստներ կտեղափոխվեն Եվրոպա, ինչը շատ լավ կլինի թե՛ նրանց, թե՛ հայկական ֆուտբոլի համար»,- նշել է Հայաստանի հավաքականի ավագը: