Չորս շախմատիստներ Կարեն Ասրյանի հուշամրցաշարի առաջատարներն են

Երեկ տեղի ունեցավ Կարեն Ասրյանի հուշամրցաշարի 3-րդ տուրը: 2-րդ տուրից հետո առաջատարների շարքում գտնվող 17 շախմատիստներից միայն 4-ին՝ Վլադիմիր Օնիշչուկին, Վահե Բաղդասարյանին, Հովիկ Հայրապետյանին և Հայկ Վարդանյանին, հաջողվեց հաղթանակներ տոնել: Այսպիսով 3-րդ տուրից հետո հենց այս շախմատիստներն են 3-ական միավորով գլխավորում աղյուսակը: 14 շախմատիստ առաջատարներին զիջում են կեսական միավորով:
Հիշեցնենք՝ Կարեն Ասրյանի անունը կրող միջազգային մրցաշարին այս տարի մասնակցում են 8 երկրների՝ Հայաստանի, Ամերիկայի Միացյալ Նահանգների, Գերմանիայի, Ռուսաստանի, Ուկրաինայի, Իրանի, Արաբական Միացյալ Էմիրությունների, Էստոնիայի, 95 շախմատիստներ:

Այս տարի որակական առումով մրցաշարը չափազանց ուժեղ կազմ ունի: Մասնակիցների թվում են 12 գրոսմայստերներ, ինչի շնորհիվ մրցաշարի պատանի մասնակիցները հնարավորություն են ստացել լրացնելու գրոսմայստերի նորմա:

Հիշեցնենք նաև, որ Կարեն Ասրյանը նորանկախ Հայաստանի ուժեղագույն շախմատիստներից մեկն էր: Նա ոսկյա տառերով է գրել իր անունը հայկական և համաշխարհային շախմատի պատմության մեջ: Շախմատային կարիերայի ընթացքում նվաճած տիտղոսների ոչ լրիվ ցանկը՝ Հայաստանի եռակի չեմպիոն, Հայաստանի ազգային հավաքականի կազմում Եվրոպայի և Համաշխարհային օլիմպիադայի չեմպիոն: