Համահայկական խաղերի երրորդ ջահը կվառվի Տիգրանակերտում

ԱՀ կառավարության նիստերի դահլիճում այսօր՝ հունիսի 22-ին, ԱՀ Նախագահ Բակո Սահակյանի գլխավորությամբ կայացել է աշխատանքային խորհրդակցություն՝ նվիրված Արցախում կայանալիք Համահայկական 7-րդ ամառային խաղերի անցկացմանը: Խորհրդակցության ընթացքում քննարկվել է խաղերի նախապատրաստական կազմակերպչական աշխատանքների իրականացման հարցերի լայն շրջանակ:

Բ. Սահակյանը կարևորել է Համահայկական խաղերի նշանակությունն Արցախի մարզամշակութային կյանքում և Հայաստան-Արցախ-Սփյուռք եռամիասնության ամրապնդման գործում՝ ընդգծելով, որ անհրաժեշտ է անել հնարավորը Համահայկական խաղերն Արցախում ամենաբարձր մակարդակով կազմակերպելու և անցկացնելու ուղղությամբ:

Խորհրդակցությանը մասնակից Համահայկական խաղերի համաշխարհային կոմիտեի նախագահ Իշխան Զաքարյանն ասել է, որ Համահայկական խաղերի առաջին ջահը վառվել է Մուսա լեռան ստորոտում՝ Սուրբ Աստվածածին հայկական եկեղեցում, երկրորդ ջահը՝ Խոր Վիրապում Գրիգոր Լուսավորչի կանթեղից, իսկ երրոդը կվառվի այսօր երեկոյան Արցախի Տիգրանակերտ պատմամշակութային արգելոցում: Ըստ կարգի Համահայկական խաղերի ջահը վառվում է երեք վայրում՝ Սփյուռքում, Հայաստանում և Արցախում: Երեք պատմական վայրերից բերված ջահերը խաղերի բացման ժամանակ Ստեփանակերտի հանրապետական մարզադաշտում կմիացվեն գլխավոր ջահին:
Նա իր ելույթում մասնավորապես ասել է. «Համահայկական խաղերի մասնակիցների թիվն այս պահին 5127 է: Վերջնական արդյունքները կունենանք հուլիսի 1-ին, որից հետո կամփոփվեն արդյունքները և հանդես կգանք մամուլի ասուլիսում: Ներկայումս ամենամեծ թվով պատվիրակությունները ԱՄՆ-ից են, Ռուսաստանի Դաշնությունից, Ֆրանսիայից, Լիբանանից, Եգիպտոսից, Իրանի Իսլամական Հանրապետությունից և Թուրքիայից: Համահայկական խաղերին մասնակից երկրների աշխարհագրությունը բավականին լայն է, և կարծում եմ, որ 7-րդ խաղերն իր թվակազմով չի զիջելու նախորդ խաղերին»:
Նա տեղեկացրել է նաև մինչ այժմ կատարված և կատարվելիք աշխատանքները և համապատասխան գերատեսչությունների ղեկավարներին տվել մի շարք հանձնարարականներ՝ Համահայկական 7-րդ ամառային խաղերին բարձր և պատշաճ ձևով ներկայանալու համար:
Ըստ Ի. Զաքարյանի՝ պետք է անպայման լուծել «Wi-Fi » կապի խնդիրը, որպեսզի հյուրերը կարողանան ազատ և արագ օգտվելու հնարավորություն ունենան: Օգոստոսի 1-8-ը պետք է Ստեփանակերտում գործեն արագ սննդի կետեր, որոնք բաց կլինեն մինչև ուշ գիշեր. վաճառվող ապրանքների գները կլինեն մատչելի: Ճանապարհների տարբեր հատվածներում համահայկական 7-րդ խաղերի վերաբերյալ պետք է տեղադրվեն պաստառներ: Նա կարևորել է նաև Ստեփանակերտի տարբեր հատվածներում մեծ էկրանների տեղադրումը, որպեսզի յուրաքանչյուր ոք կկարողանա հետևել խաղերի ընթացքին: Խաղերը կհեռարձակվեն ուղիղ եթերով:

ԱՀ պետնախարար Գրիգորի Մարտիրոսյանի խոսքով էլ անվտագության ապահովման տեսանկյունից անհրաժեշտ է, որԱրցախ այցելող ավելի քան 5000 քաղաքացիների անհատական տվյալները հաշվառվեն: Այդ գործընթացը պետք է այնպես կազմակերպել, որ ավելորդ դժվարություններ և դժգոհություններ չառաջանան:

Իսկ Համահայկական խաղերի գլխավոր ռեժիսոր Ռուբեն Հովհաննիսյանն էլ ասել է, որ խաղերի կազմակերպման և անցկացման համար հաշվի են առնված ցանկացած մանրուք, որոնք ճիշտ և ժամանակին կատարելու դեպքում որևէ խոչընդոտ չի առաջանալու:
Նրա խոսքով՝ գեղարվեստական մասով նախապատրաստական աշխատանքներն ամբողջությամբ ավարտված են: Ըստ նախապես կազմված ժամանակացույցի՝ առաջին գործնական աշխատանքներն Արցախում սկսվելու են հուլիսի 3-ից:
Խորհրդակցությանը մասնակցում էին ԱԺ նախագահ Աշոտ Ղուլյանը, պաշտոնատար անձինք, Համահայկական խաղերի կազմակերպման Արցախի գրասենյակի ներկայացուցիչներ և այլք: