Հինգշաբթի, 18 սեպտեմբերի, 2025 թ.
|
Ստեփանակերտում`   +15 °C

«Ծառուկյանի և Վանեցյանի հանդիպումների մասին վաղուց ենք իմացել». Ալեն Սիմոնյան

«Ծառուկյանի և Վանեցյանի հանդիպումների մասին վաղուց ենք իմացել». Ալեն Սիմոնյան
992
Երկուշաբթի, 15 հունիսի, 2020 թ., 12:15

«Քրեական գործերը հարուցվել են շատ ավելի շուտ, քան պարոն Ծառուկյանն այն այգում հայտարարություններ էր անում՝ կապված իշխանության 100 տոկոս փոփոխության հետ»,- այսօր՝ լրագրողների հետ ճեպազարույցի ժամանակ հայտարարել է ԱԺ փոխնախագահ Ալեն Սիմոնյանը։

Նրա խոսքով՝ ընտրակաշառքը վերաբերյալ փաստաթուղթը ևս գտնվել է ավելի շուտ, քան երեկ իմքայլականներն այն հրապարակում էին:

«Ձեզ թվում է՝ Ծառուկյանի հանդիպումների մասին մենք իմացել ենք պարոն Ծառուկյանի հայտարարություններից հետո՞, դուք չարաչար սխալվում եք: Պարոն Ծառուկյանը հանդիպել է պարոն Վանեցյանի հետ նույն այգում բազմաթիվ անգամ, և պարոն Վանեցյանը նույնպես դա չի հերքել»,- ասել է Սիմոնյանը:

Հարցին, թե իշխանությանը չի՞ անհանգստացրել այն հանգամանքը, որ Ծառուկյանը և Վանեցյանը հանդիպել են ու կարող են պայքարել իշխանության դեմ, Սիմոնյանն ասել է. «ՀՀ իշխանությանն անհանգստացնում է և մտորումների տեղիք է տալիս միայն ՀՀ քաղաքացիների հետ շփումը: Թե ով որ այգում ում հետ կհանդիպի, ինչ հին քաղաքական մեռել կբերի քաղաքական դաշտ, դա չորրորդական բան է: Մեզ համար կարևորը ՀՀ քաղաքացիների հետ համագործակցությունն է»: